कविता- बुद्ध एकदा समजून घे!

 तु राम होऊ नको

मला सीता होणं जमणार नाही

माझ्याच्यानं अग्निपरिक्षा देणं तर होणारच नाही

आणि तुझ्याविना तर सोडच

तुझ्यासोबतचाही वनवास जमणार नाही

लग्नात घेतलेल्या सप्तवचनातलं 'जन्मभर तुला साथ देईन' 

हे वचन पाळता न आलेल्या तुला 

माझ्याच्याने एकवचनी न्यायनिष्ठ म्हणणं होणारच नाही...

तु लक्ष्मणही होऊ नकोस

मला उर्मिला होणं जमणार नाही

राजवाड्यातली सुखं टोचतील मला

बंधुप्रेमाचं वचन पाळताना

सप्तपदीतलं तेच सात जन्माच्या सोबतीच वचन

तु ही तुझ्या भावासारखंच कोलून दिलंस

विरहात जळत तुला श्रेष्ठ बंधुप्रेमी म्हणणं मला जडच जाईल....

तु बुद्धही होऊ नकोस

मला यशोधरा होणं जमणार नाही

दुःखाचं मुळं शोधायला घर सोडणाऱ्या तुला ते भेटणार नाही

कारण तु ते माझ्या हृदयात घर सोडताक्षणी ठेऊन जाशील

शांततेच्या प्रेमात असणारा तु

माझ्या मनातला गोंधळ ऐकुही शकला नाहीस

ज्या गोष्टींच्या शोधार्थ तु गेलास 

त्याच गोष्टी माझ्याजवळ सोडून गेल्यानं

त्याचं ज्ञान तुला झालं हा दावा मी खोटा पाडीन

आणि सप्तपदीत तुला दिलेलं विश्वासार्हतेचं वचन

माझ्याकडुन मोडलं जाईल

तु तरी साथ देण्याचं कुठं पाळलंस

हां,व्हायचंच असेल तर तुकाराम हो तु

तुझ्या तोंडावर तुला कचाकचा भांडत 

तुझ्या काळ्या पांड्याला शिव्या देत का होईना

पण तुझी श्रद्धा आणि संसार तुझ्याचं साथीनं सांभाळणारी

तुझी आवली होणं मला जमेल 

खरंंतर मला ते जास्ती आवडेल....!!!

C/p

------------

कविता -  बुद्ध एकदा समजून घे!

राम लक्ष्मणाचे ठीक आहे,

पण बुद्धाबाबत बोलू नको.

पैलू पडलेल्या हिऱ्याला,

कोळश्याबरोबर तोलू नको.

यशोधरा खंबीर होती,

म्हणूनच गौतम मुक्त झाला.

ज्याला उमगला बुद्ध,

तोच त्याचा भक्त झाला.

तू सुद्धा तुझी चौकट मोड,

लागली जर का ठेच,

तर धाय मोकलून रड.

समतेची गाणी गाताना स्त्री वादाचा शंख करू नको, 

एकाच पारड्यात सर्वांना तोलून  उगीच डंख मारू नको.

सतत दुसऱ्याला दूषणं देणं ,

फार काही बरे नाही.

आपल्या अपयशाला दुसरा धनी,

हे काही खरे नाही.

जेव्हा तुला बुद्धासोबत  महामायासुद्धा समजेल,

आपल्याला अजून बुद्ध कळलाच नाही,

हे  तुला त्याच क्षणी उमजेल.

 

म्हणुनच वेडे बुद्ध एकदा समजून घे!

©के.राहुल, 9096242452